Reis deur Klatergoud
Arriana was nog nooit so gelukkig in haar lewe nie. Sy is saam met die liefde van haar lewe, Finn O'Reilly en het die Kersfees saam met sy groot familie in Ierland spandeer. Die O'Reillys het haar dadelik as 'n suster en 'n dogter aanvaar en vir die eerste keer voel sy die geborgenheid en onvoorwaardelike liefde wat sy nooit in haar ouerhuis ervaar het nie. Totdat 'n tragedie haar en Finn dwing om hulle vakansieplanne te laat vaar en na Suid-Afrika te vlieg.
Hier word sy gekonfronteer met die spoke van haar verlede en een vir een tuimel die geraamtes uit die kas. Is dit toevallig dat albei haar ouers in die hospitaal is? Hoekom loop haar eks se nuwe vrou, 'Kugel-Barbie', rond asof Arriana se ouerhuis aan haar behoort? Was haar eksman nog altyd so 'n swakkeling en eejit? En hoekom vibreer haar spidey sense as Giacomo Giovetti in die omgewing is?
Terwyl Arriana met die moeilikste uitdagings van haar lewe worstel, is Finn daar om te ondersteun. Maar gaan Finn altyd daar wees? Gaan al sy geheime en die besluite wat hy in die verlede geneem het, hom verhoed om vir haar te gee wat sy regtig nodig het?
Reis deur Klatergoud, Boek Twee van die Reis-reeks,verken net hóé interessant verhoudings kan raak nadat twee uiteenlopende karakters bymekaarkom en hulle lewens saam begin.
"Leandra Naudé het as debuutskrywer groot sukses behaal met haar SuperRomanza, Reis deur die hart, uitgegee deur Lapa. In 2019 het sy weggestap met die Imbali toekenning daarvoor. Terwyl die skrywer oortuig was dat Arriana en Finn nog baie het om die leser te bied, was daar nie gelykpad na publikasie nie. Persoonlik voel ek die probleem is inherent aan die Romanza kultuur. In reekse staan nuwe karakters in die hoofrolle, terwyl vorige hoofspelers dan newekarakters word, wat in hierdie geval nie van toepassing is nie." - Amanda, GoodReads
"Indien jy van 'n romanse met 'n hele paar "twists" hou, is dit die boek om te lees. Die storie is onvoorspelbaar; 'n verfrissende uitsondering op die reël van romanzas. Dit en die feit dat die karakters alles behalwe perfek is, stoei met hulleself en veral met ander twyfelagtige karakters én boonop 'n hele paar gevaarlike situasies oorleef, laat mens wonder in watter genre die boek pas. Dit alles maak die boek boeiend en vars en moeilik om neer te sit! Ek beveel die boek warm aan. " - Christine Smith, GoodReads
"Die skrywer, Leandra Naude, het die storie wêreld bekroon met haar eerste boek, Reis deur die Hart. Haar 2de reis van die die reeks, Reis deur Klatergoud is net so boeiend soos die eerste. Haar storielyn en karakters het sterk persoonlikhede, veral Arriana se veelvoudige sê goed boei jou, laat jou lag en vind jy jouself dadelik in die alledaags." - Marthelle Gouws, GoodReads
Koop nou!
Reis deur die Hart
Arriana, 'n maatskaplike werker, brand uit weens te lang ure se werk asook om die heeltyd met volwassenes en kinders se probleme te doene te kry. Teen die einde van 'n uitmergelende vergadering met die maatskaplike bestuur in die gemeenskap waar sy werk, bedank sy op die ingewing van die oomblik. 'n Vriend reel vir haar werk in Mauritius as 'n kroegdame/kelnerin by 'n eksklusiewe hotel in Mauritius, en binne maande word haar lewe handomkeer verander. Sy ontmoet die enigmatiese triljoenêr-Ier Finnigian O'Reilly wat met sy sjarme en persoonlikheid haar hart kort voor lank in die palm van sy hand hou.
En hy is nie onaangeraak deur Arriana se plat-op-die-aarde-persoonlikheid nie. Alles is egter nie pluis op die eiland nie. Jong meisies raak die een na die ander weg, en toe Arriana ook ontvoer word, word 'n nes van mensehandel oopgeruk. Gaan Finnigan, die plaaslike polisie en Interpol egter betyds wees om Arriana en die jong meisies se lot te keer?
"Debuutskrywer, Leandra Naude, het die romansewêreld letterlik ingestoom met haar SuperRomanza, Reis deur die hart. Die storielyn asook die karakters is besonder sterk en veelvlakkig en daar skort niks aan taal- en skryfvaardigheid nie. Daar word plek-plek kru taal gebruik, maar nooit buite karakter of konteks nie." - Amanda, GoodReads
"Die beste Super Romanza wat ek in 'n lang tyd gelees het! Ek was regtig spyt toe ek klaar was. Die karakters is eg en menslik. Die balans tussen humor, aksie en tintellekker liefdestonele is perfek. En hoe verfrissend dat die konflik nie weens misverstande tussen Arriana en Finn was nie! (Ek was smoorverlief op Finn en wens ek kon Arriana se vriendin wees.) Jy gaan hierdie boek in een sitting wil lees. " - Madri, GoodReads
"Ek lees nie gereeld Afrikaanse boeke nie, maar hierdie boek het my geboei. Ek het lekker gelag en ook trane afgevee. Heerlike leesgenot!! - Elsabe ten Cate, GoodReads
Koop nou!